شبـــــاب الخــــــــــير ..........عادت من جديد

بسم الله الرحمن الرحيم

وبه نستعين

الحمد لله عادت شباب الخير للسنة التانية على التوالى والحمد لله قدرنا نعمل شنط رمضان

ومش بس شنط رمضان قدرنا نروح دار ايتام كمان وده بعد الحمد لله كرم ربنا علينا انه

جمع شباب الخير من تانى ووقفنا ايد واحدة كالعادة والتفاصيل سوف اسردها لكم فى السطور القادمة

1- مشروع شنط رمضان

طبعاً احنا حددنا المشروع ده من قبل رمضان وحدننا اننا نجمع اللى نقدر عليه من التبرعات ونعمل اللى

نقدر عليه من شنط وبجد ربنا كرمنا من وسع وجمعنا مبلغ معقول الحمد لله اللى بيه نقدر نعمل شنط محترمة

وحددنا اليوم اللى هنشترى فيه محتويات الشنط وفعلاً نزلنا واشترينا المتحويات

وربنا يسر علينا بجد حاجات كتير وعقبات كتير كانت فى بالنا زى اننا مش هنقدر نعمل كده ومش هنلحق لكن الحمد لله قدرنا وفعلاً اشترينا الحاجات وربنا حللنا مشكلة تانية كانت مواجهننا اننا هنبعئ الشنط فين؟؟؟؟؟؟؟؟ لكن الحل جه الحمد لله من عند ربنا ان فى واحد من شباب الخير عنده شقة قالنا ممكن نروح نعبئ فيها الشنط والصدفة ان الشقة الحمد لله

كانت قريبة مننا كلنا والحمد لله قدرنا نروح ونعبئ الشنط فى كل يسر الحمد لله ، طبعاً هتقولوا الشنط ديه كانت

مصيرها فين بالظبط يعنى عملنا الشنط هتروح فين بقى الشنط ديه وهنا تدخل القدر فجاءت احدى الفتيات من شباب الخير من كلية اعلام وقالت لنا انها وبعض زماليها فى الكلية هيذهبوا لدار ايتام واٍن دار الايتام محتاجين

شنط رمضان فحددنا على طول ان الشنط ديه مصيرها لدار الايتام وبكده يتلخق مشروع خيرى تانى وهو زيارة دار ايتام وبدلاً من ان كنا عملنا مشروع واحد وهو شنط رمضان ربنا يسر لنا مشروع خيرى تانى وهو زيارة دار ايتام لادخال السعادة على الاطفال الايتام الذين ليس لهم اى ذنب ان ولدوا ايتام او اهليهم ليس عندهم اى رحمة او شفقة او ضمير لانهم جابو هؤلاء الملائكة للدنيا وتركوهم فى الدنيا بلا سقف بيت يحميهم من الشارع

وهنا هنتكلم شوية بالتفصيل عن يوم دار الايتام

2- مشروع دار الايتام "دار نور الرحمن لرعاية الايتام"

دار"نور الرحمن" لرعاية الايتام

المقر فى فيصل

عدد الاطفال 44 طفلاً

اعمارهم ما بين 6 اشهر و 10 سنوات

وكما ذكرت الصدفة هى التى تدخلت وجعلت هذة الزيارة تاتى وفعلاً الحمد لله تم تحديد اليوم الذى سوف نذهب فيه الى دار الايتام وتم التجمع عند باب الجامعة الرئيسى اذ يشمل الباص شباب من معظم كليات الجامعة

كلية تجارة و كلية اعلام و كلية اداب وكلية هندسة

وذهبنا الى دار الايتام ونحن جاهزون للترويح مع الاطفال والحمد لله ذهبنا الى الدار فبالصدفة وجدنا شباب اخرين فى الدار فهم شباب يذهبون بصفة مستمرة للدار يا مشاء الله وهذا يدل ان الخير موجود وان بلدنا فيها خير وان كان الظاهر امام الجميع هو الظلم والتجبر ولكن والله هناك خير ولكنه مستتر ، المهم قعدنا مع الاطفال

وكان يوم من احسن الايام اللى عدت عليا فى هذا الشهر العظيم فكانت كل ابتسامه يبتسمها كل طفل كانت تزيدنا كلنا فرحاً و سعادة

،الحمد لله ربنا يدمها سعادة على كل الامة الاسلامية يارب

وانقضى اليوم بسرعة البرق كما مر شهر رمضان الضيف العزيز

ولكننا جمعنا اننا لن ننقطع على زيارة هذا الدار ابداً فنحن سعدنا بهذا الدار الذى يعمل به اناس محترمين ربنا يجعل اعمالهم كلها فى ميزان حسناتهم

وديه كانت نهاية المشروعين "شنط رمضان & زيارة دار ايتام"

بس مش نهاية شباب الخير ان شاء الله وانتظروا منا مشروعات قادمة

وربنا يجزيكم كل خير